"Ҳудудгазтаъминот" АЖ олий ўқув юртлари битирувчиларини газ таъминоти тизимига жалб этади.

     "Ҳудудгазтаъминот" АЖ олий ўқув юртлари битирувчиларини газ таъминоти тизимига жалб этмоқда. Бундай ташаббуснинг асосий мақсади - истеъдодли ёшлар ва истиқболли йигит – қизларни келажакда машаққатли, шарафли ҳамда ижтимоий аҳамиятга эга бўлган газ соҳаси мутахассислари сулоласининг давомчиларига айланишига кўмаклашиш ва уларни қўллаб-қувватлашдир. 

   Ҳозирги кунда "Ҳудудгазтаъминот" АЖ мамлакатимизнинг техник йўналишдаги етакчи университетлари билан ҳамкорлик қилмоқда. Ҳамкорлик давомида И.М. Губкин номидаги Россия Давлат нефть ва газ университети, Тошкент давлат техника университети, Фарғона ва Жиззах политехника институтлари, Қарши муҳандислик-иқтисодиёт институти битирувчилари газ таъминоти филиалларининг ишлаб чиқаришларида иштирок этадилар, амалий машғулотларда кўникма оладилар. Якунга кўра эса, битирувчиларнинг энг иқтидорлилари доимий иш учун танлаб олинади.
        Алоҳида таъкидлаш керакки, "Ҳудудгазтаъминот" АЖ "HGT Training centre" ўқув марказида тор доирада ихтисослашган мутахассислар учун ўқув курсларини очди. Айнан шу ерда Италиянинг  “Pietro Fiorentini S.p.A” компанияси билан биргаликда муҳандислар мактаби ташкил этилган бўлиб, у ерда соҳанинг 14 та тор доирадаги йўналишлар бўйича мутахассислар тайёрланади. Ўтган йили мазкур ўқув марказида Тошкент давлат техника университетининг битирувчи курс талабаларидан 50 нафарга яқини махсус курсларда таълим олдилар. Уларга газ таъминоти соҳасида катта тажриба ва билимга эга бўлган етакчи мутахассислар дарс беришди.

       Тренинг натижаларига кўра, ёшларнинг энг иқтидорлилари "Ҳудудгазтаъминот" АЖ тизимида ишга жойлаштирилди ва сертификат қўлга киритди. "Ҳудудгазтаъминот" АЖ да бошқаруви раиси иштирокида 20 нафар ана шундай ёш битирувчиларни тақдирлаш маросими бўлиб ўтди. Тадбир давомида самимий ва ўзаро фикр-мулоҳазаларга бой мулоқот иштирокчиларга манзур бўлди. Унда бўлғуси соҳа эгаларига газ таъминоти тизимида ишлаш истиқболлари, ишлаб чиқариш занжирларини рақамлаштиришда фан ва таълимнинг ўрни, соҳани ислоҳ қилиш учун ёш ва истиқболли кадрларни жалб қилиш муҳимлиги ҳақида сўзлаб берилди.

        Тез орада “HGT Training centre”  ўқув маркази етакчи таълим муассасаларининг энг талабгор касблардан бирини эгаллашга интилаётган ва ўз ҳаётини газ таъминоти соҳасини ривожлантиришга бағишлайдиган янги битирувчилари учун ўз эшикларини очади.

"Ҳудудгазтаъминот" АЖ матбуот хизмати